Il-futur tax-xogħol fl-Unjoni Ewropea għal soċjetà iktar ġusta
Artiklu miktub minn Joe Sciberras, Kap tal-Komunikazzjoni u Outreach, SEM
Ippubblikat fil-ġurnal L-Orizzont
L-Unjoni Ewropea, sa minn
qabel il-pandemija diġà kienet qiegħda tħares lejn futur sostenibbli
għall-kontinent bit-tfassil ta’ miri ambizzjużi u bl-oġġettiv ewlieni li
sas-sena 2050 l-Ewropa tkun l-ewwel kontinent newtrali għall-klima. Dan jista’
jintlaħaq billi ssir tranżizzjoni ekoloġika u diġitali, b’investiment qawwi ta’
biljuni ta’ ewro f’teknoloġiji li jtejbu l-użu effiċjenti tal-enerġija,
fil-qalba għal ekonomija ċirkulari li tuża u tirriċikla r-riżorsi, jitnaqqsu
l-emissjonijiet u t-tniġġis u l-ħsara lill-ambjent b’azzjonijiet konkreti favur
il-klima.
Bla dubju, din it-tranżizzjoni
se ġġib numru ta’ tibdiliet fil-qasam tax-xogħol, minħabba li biex isseħħ, se
jkun hemm bżonn ta’ ħiliet ġodda għal impjiegi ġodda u modi differenti ta’ kif
naħdmu. Hu importanti li, waqt li l-ħaddiema jkollhom il-ħiliet meħtieġa għal
impjiegi li dejjem javvanzaw u jinbidlu, is-suq tax-xogħol ikompli jikber
fl-innovazzjoni u l-kwalità. Fl-istess ħin għandha tibqa’ tkun imħarsa l-protezzjoni
soċjali kemm tal-ħaddiema nfushom, tal-familji tagħhom u l-bqija
tas-soċjetà.
Dan is-suġġett se jkun diskuss
f’laqgħa pubblika onlajn li se tkun organizzata minn Servizzi Ewropej f’Malta
(SEM) nhar il-Ħamis 14 ta’ Ottubru fil-5pm.
Il-laqgħa hija t-tielet minn
serjet ta’ laqgħat bit-tema, ‘L-Ewropa li nixtieq’, li l-għan tagħhom hu li
f’Malta, bħal fil-bqija tal-Unjoni Ewropea jkun hawn dibattitu u
parteċipazzjoni attiva f’inizjattiva msejħa Konferenza dwar il-Futur
tal-Ewropa. Fil-laqgħa, numru ta’ kelliema li jmissu kuljum mad-dinja
tax-xogħol u ma’ realtajiet soċjali ta’ kull tip, jiddiskutu
l-implikazzjonijiet fuq is-suq tax-xogħol fis-snin li ġejjin. Il-pubbliku huwa
mħeġġeġ jieħu sehem onlajn billi jirreġistra bl-email li jinsab fl-aħħar ta’
dan l-artiklu.
M’hemmx dubju li l-Unjoni
Ewropea għandha standards għoljin ta’ kundizzjonijiet tax-xogħol
għall-ħaddiema, iżda forom ġodda ta’ impjiegi u realtajiet ġodda fis-swieq
tax-xogħol, joħolqu sfidi ġodda li jeħtieġ jiġu indirizzati. Fost dawn insibu
sfidi marbuta man-nuqqas ta’ ħaddiema f’ċerti oqsma tal-impjiegi, l-iżbilanċ li
għadu jeżisti bejn l-impjiegi tan-nisa u tal-irġiel li jagħmlu l-istess xogħol,
in-nuqqas ta’ ħiliet għal impjiegi li qegħdin isiru dejjem aktar speċjalizzati,
il-bilanċ bejn il-ħajja privata u tal-familja u dik tax-xogħol, u
l-kundizzjonijiet ħżiena f’ċerti tipi ta’ impjiegi.
Huwa fatt li qegħdin ngħixu
f’soċjetà li dejjem qed tikber fl-età u kulma jmur, in-numru ta’ ħaddiema li
jagħmlu tajjeb għall-pensjonijiet u l-benefiċċji soċjali dejjem jonqos, waqt li
jiżdiedu n-numri ta’ dawk li jirtiraw. Ma nistgħux ninjoraw il-fatt li kulma
jmur qed ikollna realtajiet ġodda ta’ faqar. Għalhekk irid ikun żgurat li t-tranżizzjoni
ekoloġika u diġitali ssir f’kuntest fejn l-impjiegi, il-ħiliet, l-innovazzjoni
u l-protezzjoni soċjali, jimxu id f’id, kemm għal dawk li huma fid-dinja
tax-xogħol u kemm għal dawk li mhumiex.
Kien
għalhekk li l-Unjoni Ewropea trid tkompli tissaħħaħ bħala Unjoni aktar
inklussiva u aktar ġusta. Trid tkompli tibni fuq il-Pilastru Ewropew
tad-Drittijiet Soċjali li ġie adottat erba’ snin ilu u li fih stabbiliet numru
ta’ prinċipji u drittijiet ewlenin għal kundizzjonijiet tax-xogħol u ta’ għajxien
aħjar, biex ikollna Unjoni Ewropea aktar ġusta u inklussiva.
Kull min ikun interessat jieħu sehem fid-diskussjoni onlajn tal-14 ta’ Ottubru
jew jixtieq ikun jaf aktar dwar il-Konferenza dwar il-Futur tal-Ewropa, jibgħat
email lil info.sem@gov.mt jew iċempel 2200 3300.