#noħlomlixidarba: Ktieb ġdid għall-istudenti dwar il-valuri tal-Unjoni Ewropea
Artiklu miktub minn Joe Sciberras, Kap tal-Komunikazzjoni u Outreach, SEM
Ippubblikat fil-ġurnal L-Orizzont
Għat-tieni sena
konsekuttiva, Servizzi Ewropej f’Malta u Europe Direct Valletta ppubblikajna
ktieb dwar il-valuri tal-Unjoni Ewropea. Dan il-ktieb, bit-titlu ‘#noħlomlixidarba’
huwa mmirat għal studenti ta’ bejn l-14 u l-15-il sena u jsegwi l-ewwel
pubblikazzjoni tagħna tas-sena l-oħra, ‘Mas-Siġra tal-Ballut’ għal studenti ta’
11 u 12-il sena.
Għaliex
#noħlomlixidarba?
Il-ktieb il-ġdid
huwa bbażat fuq il-ħolm u l-aspirazzjonijiet ta’ grupp ta’ żgħażagħ li jgħixu
fi blokka ta’ appartamenti. Permezz ta’ 10 stejjer fittizji u qosra dwar
il-ħajja ta’ kuljum ta’ dan il-grupp ta’ ħbieb, l-awtriċi Clare Azzopardi,
twassal lill-qarrejja biex faċilment jidentifikaw lilhom infushom mal-karattri
tal-istejjer tal-ktieb, bil-ħolm u l-aspirazzjonijiet tagħhom. L-istejjer huma
mżewqa b’illustrazzjonijiet dwar il-karattri minn Naomi Gatt.
Kull storja, li
hi marbuta ma’ karattru partikolari, toħroġ valuri marbuta mal-Unjoni Ewropea.
Il-karattri – Kat, Vik, Seph, Lea, Ben, Ter, Jes, Sal, Ken u Per - għandhom ħafna ħolm li jixtiequ jwettqu
f’ħajjithom u lesti jaħdmu biex iwettquhom, flimkien ma’ sħabhom. Iktar minn
hekk, il-grupp jiffaċċja sfida komuni u permezz tal-għaqda u l-ħbiberija ta’
xulxin jirnexxilhom jgħinu lil Sam joħroġ minn problema li kellu. Inħallu
f’idejn il-qarrejja biex jiskopru x’kienet il-problema u kif jirnexxilhom
isolvuha.
Il-ħsieb ewlieni
wara l-istejjer tal-ktieb hu li fl-Unjoni Ewropea, iż-żgħażagħ isibu l-appoġġ
biex iwettwu l-ħolm tagħhom, kemm għalihom infushom u kemm għall-ġid
tas-soċjetà li jgħixu fiha. Biex ngħinu lill-qarrejja jaslu għal dan, wara kull
storja, il-qarrejja jsibu paġna illustrata bi kwotazzjoni, referenza u ħolqa bi
QR code għal iktar tagħrif dwar dak li twettaq l-Unjoni Ewropea fil-qasam
partikolari li joħroġ mill-istorja.
It-temi li
joħorġu mill-ktieb huma: l-għaqda fid-diversità tal-pajjiżi u ċ-ċittadini
tal-Unjoni Ewropea, il-prinċipji tal-moviment ħieles, il-multikulturaliżmu,
l-inklużjoni, l-ugwaljanza, id-demokrazija, il-ħarsien ambjentali, l-azzjoni
favur il-klima u l-iżvilupp sostenibbli, l-opportunitajiet ta’ studju u xogħol,
l-iżvilupp diġitali, l-edukazzjoni u t-taħriġ, il-volontarjat, l-isport,
ir-responabbiltà ċivika u ċ-ċittadinanza attiva.
Il-qarrejja
jagħrfu li huma ċittadini ta’ Ewropa li hi bil-wisq ikbar mill-konfini ta’
gżiritna, mhux biss ġeografikament u f’termini ta’ popolazzjoni, imma wkoll
f’dik li hi diversità ta’ kulturi u ideat, opportunitajiet u benefiċċji.
Minkejja dawn id-diversitajiet hemm valuri komuni li xtaqna li joħorġu f’dan
il-ktieb.
Il-ktieb
nidejnieh f’attività li kellna fis-16 ta’ Novembru bil-parteċipazzjoni ta’ tliet
studenti mill-Iskola Sekondarja tal-Mosta, tal-Kulleġġ Marija Reġina. Flimkien
mal-awtriċi, Mariah Bonnici, Ilona
Schembri u Ailey Incorvaja qraw siltiet mill-ktieb. Huma kienu akkumpanjati
mill-għalliema EliClare Mikkelsen. Fit-tnedija tal-ktieb, ingħaqdu magħna b’mod
virtwali żewġ klassijiet mill-iskola, immexxija mill-Kap tal-iskola, Gaetano
Bugeja. Nirringrazzjahom li għamluha possibbli li jkollna l-parteċipazzjoni
tal-istudenti li jirrappreżentaw l-etajiet li għalihom hu indirizzat il-ktieb.
Min hu interessat
jaqra l-ktieb fil-verżjoni diġitali jista’ jidħol fil-website ta’ SEM fil-paġna
INFORM u jagħżel Publications (https://sem.gov.mt/latest-updates/publications). Il-ktieb se jitqassam lill-istudenti
ta’ Years 10 u 11 fl-iskejjel kollha ta’ Malta u Għawdex. Se jkollna wkoll xi
kopji stampati. Min jixtieq jakkwista kopja jista’ jibagħtilna email fuq info.sem@gov.mt.
Inħeġġu
liż-żgħażagħ ta’ dawn l-etajiet biex jaqraw il-ktieb, isiru jafu aktar dwar kif
l-Unjoni Ewropea tappoġġja t-twettiq tal-ħolm taż-żgħażagħ u, għaliex le?
Toħlom u twettaq il-ħolm tiegħek int ukoll, bl-appoġġ tal-Unjoni Ewropea.